首頁 » » 【有片】古埃及文明發威 紅軍怒炒斯巴達

【有片】古埃及文明發威 紅軍怒炒斯巴達

作者:Snowy 發表日期:2017-12-07 07:02:02 分類:

即去睇古埃及文明有幾癲:http://bit.ly/2BFYSJ1 

利物浦喺周三歐聯主場迎戰莫斯科斯巴達,客隊要出線今仗一定要贏,紅軍領隊高普亦唔敢怠慢,出盡「古埃及文明」肩負攻堅重任。呢4位球星亦不負重望,4個人入足7球,助利記大炒斯巴達7蛋,以E組首名出線!

高普今仗收起狀態一般嘅隊長佐敦軒達臣,安利簡恩代替佢嘅位置,菲臘比古天奴戴上隊長臂章,球迷對呢個決定紛紛叫好。開波只係4分鐘,利記就有穆罕默德沙拿禁區內被侵犯,得到12碼機會,古仔主射一射破網先開紀錄。

斯巴達開波冇耐就失波,部署被打亂影響咗發揮,中場完全畀利記控制。紅軍15分鐘有古埃及文明打出教材式反擊,最後羅拔圖費明奴交畀古仔整多粒。主隊愈踢愈有,4分鐘後沙迪奧文尼傳中畀客隊守將用手擋到,「費綿龍」執漏抽入網,利記19分鐘入3球,半場亦以3:0返更衣室。

紅軍殺得性起,半場出番嚟2分鐘又有斬獲,後備上陣嘅占士米拿斬個靚波畀文尼,呢位塞內加爾國腳一個超靚嘅窩利幫球隊再度擴大領先優勢。古仔喺50分鐘起腳射中對方守將彈入,完成帽子戲法。斯巴達防線散晒,谷前冇料到,後防亦愈嚟愈多空位,76分鐘反擊,史杜列治傳畀文尼,後者人前波後但係依然踢到個波,客隊門將施歷哥夫回唔切身,阻止唔到球隊再吞一蛋。沙拿完場前入多球埋齋,古埃及文明人人都有波入,紅軍終以7:0大勝,力壓同晚作客和馬里博爾1:1嘅西維爾,以小組首名出線歐聯淘汰賽階段。

東網體育同你追實體壇每個精彩時刻!
http://bit.ly/2ecTF2A


本文來源:http://hk.on.cc/hk/bkn/cnt/sport/20171207/bkn-20171207053558534-1207_00882_001.html

Tag:
本文鏈接:http://www.learn-mandarin-hk.com/52652.html