旺角疑驚現拐子婆 食譜作家米媽女兒險被搶

作者:SELINA   发表日期:2017-06-06 15:02:01   分类:

旺角懷疑出現拐子婆。食譜作家米媽昨日在其fb貼文,指旺角雅蘭中心一期對開、地鐵站與報紙檔一帶發生「搶細路」疑雲,其2歲半女兒險被一名老婦強行拖走,她於晚上報警,又提醒家長要留神,出門必須拖緊孩子,以免讓「拐子婆」有機可乘。

米媽昨在其fb專頁「絲房菜」貼文,指「剛剛帶米米(其女兒)去旺角雅蘭一期睇眼科,睇完眼科行出黎(嚟),對住地鐵站,同埋報紙檔,隔黎(籬)係燈位過朗豪坊,米媽一直都拖實粒米無鬆過手,沿住報紙檔行去的士站,點知突然有個呀(阿)婆係(喺)米另一邊拖住粒米,扮曬(晒)無野(嘢)向前行,我呆左(咗),我隻手更加捉實粒米,扯返黎(嚟)自己果(嗰)邊。」

米媽續謂,「呀(阿)婆仲要繼續扯住米米手向前行多幾步,最後我抱起粒米,啤(睥)住佢問佢咩事,佢先肯鬆開手,扮無事望住我笑一笑就快快腳走左(咗)去。」米媽之後抱着女兒乘的士回家,但愈想愈驚,她又謂:「 唔發生係自己身上都唔知可以咁猖狂!大家都唔好掉以輕心!真係要睇實小朋友,就算拖實都要望下周圍環境,有拖實,但有人拖你小朋友都是即刻警戒!」米媽今日再在fb列出事發位置圖,「 等大家可以Share出去」。

旺角警區已就事件展開調查,並會在相關地點附近加強巡邏,以防止罪案發生,又強調警方非常重視懷疑企圖拐帶兒童的事件,對有關事件均會展開詳細調查,以往大部分事件查明並非屬實,沒有證據顯示涉及拐帶兒童。

警方強調,香港是世界上其中一個最安全的城市,家長毋須過慮,惟應時刻保持警覺,注意兒童的安全及意外風險。警方呼籲各家長,如發現任何可疑人士,請立即報警。


本文来源:http://hk.on.cc/hk/bkn/cnt/news/20170606/bkn-20170606132519920-0606_00822_001.html

本文固定链接: http://www.learn-mandarin-hk.com/13923.html
转载请注明:SELINA 2017-06-06 15:02:01 于 熱點資訊站 发表

上一篇: :下一篇
返回顶部