首頁 » » 海洋航行開運 暑假玩盡郵輪團

海洋航行開運 暑假玩盡郵輪團

作者:Linda 發表日期:2017-06-04 06:34:01 分類:

話咁快已經4月,夏天又就嚟到啦!呢幾日熱辣辣,心思思諗緊暑假去邊旅行?不如試下嶄新嘅郵輪旅行團啦,同一家大細過返一個特別嘅暑假。有旅行社同郵輪公司合作,將會喺暑假推出多個郵輪旅行團,更邀請了玄學大師李居明、影視紅星江美儀以及電台主持林寄韻上船做節目,仲有得玩盡船上各樣設施,絕對係今個暑假去旅行嘅首選!

去旅行唔一定要搭飛機,坐郵輪一樣咁好玩。愈嚟愈多香港人坐郵輪去旅行,成為跟團或者自由行以外嘅最新選擇。有見及此,美麗華旅遊同皇家加勒比國際遊輪合作,將會喺暑假推出多個郵輪旅行團,等大家可以坐住豪華郵輪海洋航行者號(Voyager of the Seas),玩盡多個不同航點。

海洋航行者號有乜咁正?郵輪排水量達138,000噸,船身高達15層甲板,可以接載3,840位客人。船上面更有多種不同設施,包括獨家FlowRider®甲板衝浪同真冰溜冰場,仲有泳池、高爾夫球場同健身中心等設備。另外仲有大人小朋友都鍾意嘅夢工場動畫明星,會現身於船上同大家互動。

5條郵輪旅行團嘅航線,包括有6日5夜沖繩之旅;3日2夜郵輪體驗;6日5夜峴港/順化(真美)、芽莊之旅;5日4夜三亞、峴港/順化(真美) 之旅及5日4夜高雄、台北之旅,出發日期為7月至9月。

「呢隻船無論軟件抑或硬件都做得好好,今次已經係連續第3年停泊喺香港。」皇家加勒比遊輪香港有限公司銷售及市場總監楊博雄又指,「郵輪上嘅體驗係重要,但目的地都唔可以忽視,好似我哋嘅沖繩之旅,下晝1點泊岸,第二日下晝3點先走,足足停留26個鐘,可以暢遊沖繩,唔使急急腳就要走。」

另外,將於8月25日出發嘅3日2夜郵輪體驗更加邀請了玄學大師李居明、影視紅星江美儀以及電台主持林寄韻,將電台節目《潮爆開運王》移師海洋航行者號。美麗華旅遊助理總經理(豪華郵輪部/東南亞業務部)鄭慧盈指,「依個3日2夜郵輪體驗,安排咗喺暑假之前一個周末,啱晒唔想攞咁多假嘅朋友。《潮爆開運王》會一連開兩場Show,同大家互動,相信所有人都會感興趣。」

心郁郁想報名?咁就要快手啦!除咗有早報名優惠外,於5月17日前報名參加3日2夜郵輪體驗,同房第3及第4位旅客更加免船費,仲包每位《潮爆開運王》門票。


本文來源:http://hk.on.cc/hk/bkn/cnt/lifestyle/20170427/bkn-20170427112431551-0427_00982_001.html

Tag:
本文鏈接:http://www.learn-mandarin-hk.com/13186.html